Fyrir fjórum árum keypti fyrirtækið D9 ehf. bankahúsið í Búðardal sem stendur við Miðbraut 15.
D9 er að stærstum hluta í eigu hjónanna Leifs Steins Elíssonar og Sveinbjargar Júlíu Svavarsdóttur og hafa þau síðan 2019 staðið fyrir framkvæmdum í húsinu sem var byggt árið 1970 og hýsti Búnaðarbankann, KB banka og síðast Arionbanka.
Í Dalíu er veislusalur sem rúmar 60 manns í sæti við borð en 80 í sæti án borða. Á efri hæð eru 5 svefnherbergi með salernis- og sturtuaðstöðu ásamt eldhúsi.
Húsið að Miðbraut 15 þekkist nú undir nafninu Dalía, sem er menningar- og fræðslusetur. Þar er bæði gistiaðstaða og salur sem m.a. hefur verið notaður til tónleikahalds, kynninga og fræðslu.
Dalía býður upp á marga möguleika. Staðsetningin er mjög góð og húsið er áberandi. Það er kjörið menningarsetur eða samkomustaður fyrir fólkið á svæðinu. Það að hafa einhverja starfsemi í húsinu auðgar mannlífið.
Unnið hefur verið að breytingum í Dalíu allt frá árinu 2019. Eins og svo mörgu öðru seinkaði heimsfaraldur framkvæmdunum. Húsið var innréttað sem banki og hefur það því gengið í gegnum verulega endurnýjun. Búið er að skipta um allar lagnir í húsinu, setja nýja ofna á efri hæð og gólfhita á þá neðri og loka á milli hæða. Þá er búið að skipta um gólfefni, fella veggi og reisa aðra.
